لحظات اعجاب في باص ( قصة واقعيه )

لحظات اعجاب في باص ( قصة واقعيه )

--------------------------------------------------------------------------------


مقدمة :

الله يرفع عن لبنان .. ويرحم حالنا وحالهم .. وعسى ما صابنا في ديرتهم تكفير من الذنوب !

ترى الموضوع أربعة فصول .. كل فصل أصدق من الثاني وان الله وفّق ولقيت إقبال وتشجيع على ذا السالفة بقلبها رواية وأطبعها في القاهرة وأتبرع بريعها لأطفال لبنان .. ولكل من تسوّل له نفسه المساس بأمن لبنان الحبيبة << ياشين اللي يلقط من الأخبار حتسي وهو مايدري وشو ؟!

الموضوع :

(( الفصل الأول ))

يقول الفنان الإماراتي ابو يدين قصار .. ان تساني منيب واهم اسمه "عيضه" باختصار الوضع كله باختصار .. كنت أبيه يمين .. يطلع لي يسار ) وأنا أقول : يا صدق عينك يا عيضه!


بعد عام من المكده والتعب .. مثلي مثل أي تمساح يعيش في مستنقعات الحائر جنوب الرياض ( صورة واحد وده يتسذب ويقول انه من شمال الرياض بس ماااش الوجه ما يساعد ) ؟!

قررت أخذ إجازة و أروّح عن نفسي (صورة واحد قاعد قبال المروحه) !
زرقت أقرب وكالة سياحة وقلت عطوني تذكرة سفر مدفوعة الأجر .. الله لا يحرمكم الأجر .. (صورة ممثله مصريه ماخذتن عمره عقب نجاحها في دور إغراء في فيلم سينمائي)!

قال لي راعي المكتب .. فيه عندنا عرض مسكّت .. ( الرياض – بيروت – لندن – الرياض ) قلت وش سنع لندن تسدنا بيروت و إلا تسدنا لندن .. ما نبي يضيع وقتنا في الطيارة..! ولا نبي يختلط علينا طعم اللحم وتنقلب تسبودنا


قال : لا العرض لازم تمر بيروت وتقعد فيها ثلاث أيام بلياليها مع فطور .. وصبايا يهمزّن رجليك اذا قصرت من كثر الدوجي في (السولودير) ؟!<< الله يقطع ذا السوادني راعي المكتب عارفن نظامنا وحافظة حفظ

ثم تروح لندن و تاخذ لك كم يوم وأنت تهايط في الهايد بارك وتكاسي لندن .. ثم تعوّد طرّار نمره واستمارة !

قلت : توكلنا على الله .. هات التذكرة .. نعنبو الفقر والمعاش الردي ! وأدفع له الدراهم وأخذ كوبنات الحجز للسكن .. و لاعاد جاني النوم من سعة الصدر ماغير اتقلب في فراشي تسنّي على مقلاة .. ابي موعد الطياره عشان افتك من زحمة الرياض وسمومه



(( الفصل الثاني ))


صرفت دراهمي بالدولار وصبّحت المطار بدري مع ان رحلتي الساعة ثمان في الليل من زود الحرص الله لا يعاقبنا بس !! << الله يذكر اميمتي بالخير .. تقول ياشيب عيني منك شيبااه يا زرار ... لو انك بتروح مكه تسان تنيوم كود الرحلة تفوتك ؟!

افطرت في المطار قلابه بالشطه ( ماخذها معي في باغه ... تروج تسنّها كيسة تبرع بالدم ) وتغديت في المطار بميتين وثلاثين ريال ( حبة كورسان وعصير سن توب ) << راحت علي قيمة مساج اكسترا في خربطة بوفيه مطار

وتحققت المعجزة واقلعت رحلتي في وقتها الساعه ثمان وخمسة وخسين دقيقه .. يوم وصلت بيروت الساعة 12 منتصف الليل ( حلوة منتصف الليل .. تحس انها موعد دشير )!!

وانطل شنطتي في الفندق واركض لسوق الصبايا والوجيه الحسنه .. اللي مافيه الا مشاهير ورجال اعمال وعيال نعمه .. أو طفارى مكبرين (طوووووط) بالخرق .. المكان المفضل للسيّاح العرب والخليجيين ( السلودير ) ..!<< وين ابو محمد بس عنه والله لو يدخله ان يبيع يوزره ويترك الاشراف ويشتغل صبّاب على ذا الطاولات اللي كلها ملح وقبله ( صورة البنز وهو يقول : وهــ بس وش تبين آمري ؟!) !

يوم فضت على ذا المرتزقه في السلودير .. ولالالاهم ( يدقون الغي في ميقعه )<< كناية عن المكر والخديعه والفجور والمكااااااااااييج اللي ييزي ربعها !

وذا البنات اللي يتجاكرن في عمليات التجميل (ذي تافختن برطمها ... وذي رافعتن حاجبها .. وذي مسمكرتن خشمها .. وذي ما لقت شي تعدلّه قامت خرقت لسانها وحطت فيه صامولة ووردة تسنّها رابطتن لسانها لا ينطلق )!!<< يحلفون بعض الشباب ان سعبولة البنت فيها طعم صدااء من ذا الصاموله اللي في لسانها ؟! ( تصدقون عاد اني مشتهي ذا الطعومه .. مهوب شفاحه .. بس بتأكد من سالفه الصدى )

الوكاد اني دجت في ذا السلودير.. الين تقطعت نعالي .. يوم سمحت نفسي .. وأروح يم فندق (موفمبيك) ؟!
خابرن في ذا الفندق جلسة تطل على صخرة الروشة ( صخرة المحبين ) << يقولون إنهم سموها صخرة المحبين عشان أبو شكيم يفحطون عندها هههههه !! وفي روايه انهم اذا كثرّو من شرب المخزي .. راحو يزغلون في تقاها

طلبت كاس مشروب بارد له رغوة طايره .. وريحته تسنّها زغولة مصخّن عشان اروّق المنقهه واغسل تسبدي عن توالي شابورة العمل وشاهي بالحليب اللي دبل تسبدي طول السنه ..! ( صورة موظفين يتهاوشون على قوطي حليب بوني ) ! << الخرفان تربع على عشب ... وانحن نربع على شابوره نصيحة للموظفين ترى الشابورة اخت الشعير باتسر بتنتشر فيكم الطلوع والخراريج مثل ما انتشرت في الخروف النجدي .. ثم يصير الموظف الحجازي أغلى من الموظف النجدي

يوم خذت أول رشفه ذا المشروب ابو رغوة .. ويوقف شعر صدري .. وتناقز حلم ديودي تسنّها جراد تحت لمبه .. واحس اني مرتفع عن الأرض يجي ذراع .. ثم تغيير منظر (صخرة المحبين) وصار جبل (ابو مخروق*) << فينا فينا ذا الجبل .. لو نروح للأسكيمو ..!!


يوم شفت اني مستانس .. قلت ورى ما أزرق ( الأفتر ايت ) << يسمونه بالعربي .. ( عقب الأخير ) ... عشانهم يصلون في الرياض الساعه ثمان (صورة قروي ماسكه معه يخنبق)!

يوم دخلت .. ولا شوفة عدوك .. ماغير حريم مفاصيخ .. وشباب شعورهم تسنّها لوحات تكاسي !

وانا اطب معهم في المعمعة واللملمة وكل من شفتة سلمت علية وعطيتة رقمي (وقلتلة ودي اصير صديقك وتصير صديقي) ياحليلهم مهوب يخالفون أبد..

وألقى واحدن من العيال أغليه ( غلاء يسرا لعادل امام ) << ترى يسرا ما طاعت تعجّز يالربع ومن تالي صارت تغني وتميلح شكلها تخطط على محمد سعد ذا النشيط ( صورة اللمبي وهو يقول ازهلها يا زرار كوت والله لأخليها تنسى عادل امام وسنينه العجاف)!!


بتلت في ذا الـ( الأفتر ايت ) ماغير رقص ومدابتس .. وكل ما ظميت صحت للقرسون .. والقرسون شقردي مغير ينسف علينا من ذا الزغاغيل تس(ن) ماعندهم صرف صحي في بيروت..؟

يوم استويت ويطري على بالي (بوحة) يوم يطق الرقاصة واللي معها في ذاك المرقص اللي في شارع الهرم..الله يجازي عيال ابو أسماعيل بما يستحقون .. << على طاري بوحه والهواش .. وش سر هواش السعوديين في الخارج مع بعض الجيران من الخليج ( صورة واحد ما يبي يثير أزمة سياسيه مع عيلان جابر )

يوم طلعت الشمس وأصبحنا وأصبح الملك لله وأنا أعضّد لرفيقي وهو يعضّد لي ونقعد نشر نبي تكسي ويوقف ذاك الأشهب <<<< الله لو انك في مصر يازرار !!


طيب ينفع اقول ويوقف هاك اللبناني الاطخم ويبتسم ويقول لنا : (اية تكرم بوصلكم على راسي) <<< يلوموني فيهم .. حسبي الله على ذا اليهود تسانهم حرمونا من ذا السوالف الذربه !!


ويوصلنا للفندق والظاهر أني عطيتة مية دولار أحسبها عشرة الاف ليرة << ترى راسي صاحي .. بس جازت لي سواليفه (صورة واحد يسعبل ولسانه ثقيل تسنّه رابطن في لسانه قطمة رز )! << اشوى ان شيّابنا ما يدخلون النت والا تسان ما نعرس الي يوم الدين عقب ذا الفضايح ؟!

يوم دخلنا الفندق أنا ورفيقي .. ونطيح على السرير تسنّنا زوالي طاقها المطر .. والله لو يفيض علينا احد ان يقول ذولا ميتين من ثلاثة ايام (صورة واحد منسدح على ظهره وبطنه منتفخ من البيره وسرّه نابص تسنّه بلف غطاء قدر ضغط )! و (صورة الثاني وهو منسدح على بطنه تسنّه مطب عند نقظة تفتيش)!

(( الفصل الثالث ))

أصبحنا وأصبح الملك لله << حتسية البنز في التشات .. وننزل من غرفتنا ذابحنا الجوع نبي فطور قال راعي الفندق ما عندنا لكم فطور .. أحد يفطر ذا الحزه الله لا يخزينا .. اثرنا عقب الظهر وحول العصر .. تبون الصتز احراااج .. وحسافة راح علينا فطور مجاني !

قلنا دام الدعوى مهنا فطور خل نروح للجبل نتغدى ونستانس ونتبرّد .. يوم نزلنا لصالة الفندق << أخاف أكتب "اللوبي" ثم يقولون زرار قاعد يتميلح يعني اني اعرف انقليزي! ( لوبي + هاو متش = انقليزي صياعه )

ونشوف الناس طايرتن عيونهم في التلفزيون ويتابعون قنوات اخبارية قلنا أكيد فيه تقرير عن (نطحة زيدان المشهورة) ما التفتنا عليهم وطلعنا .. وناخذ تكس ونروح للجبل ونتغدى ذاك الغداء اللي طعمه يفضخ الراس ( صورة صحن عصافير بدبس الرمان ) << ياناس من دون مبالغة والله ان نصف روحتي عشان ذا العصافير بدبس الرمان والنصف الثاني مهوب عشان الصبايا ابد !

يوم تغدينا .. وطاحت الشمس شوي (صورة سائح خليجي ملقوف يبي يمسك الشمس عشان ما تطيح الين يكثرون العوائل في الجبل)!

وتجي ذا الصوااالين والهمرات والجيوب اللي ودك تنتسب عليها رز وتاكله من نظفها ونظف اللي فيها (صورة قلب يرقع وعيون طايره وأنفاسه تلهث .. وريقه يابس)!

خذنا قاسمت الله من القز والبصبصه والتميلح والترقيم ثم نزلنا للبلد ..!

وننصا (السولودير) <<< والله لو انه آدمي تسان يطردنا من كثر ما نشبنا في حلتزه !

ونتفرج على ياسر القحطاني وسامي الجابر وذا البنات اللي لا حياء ولا حشيمه تسنّهم ما قد شافوا لاعب كوره .. ( صورة واحد منقهر يقول ياحسافة سنين ضيعناها في ذا الجامعه وما احد درى عنا )؟! << يا حليلي ابي حياء وحشيمه في بيروت هههههههه !

ولا حظنا إن شاشات التلفزيون في السولودير ما غير أخبار ؟؟

غريبه !!!! مهيب العادة ؟؟

العادة ردح وفيديو كليب .. وحنّه ورنّه ؟!!

ومع هذا ما هوجسنا بشي شين ابد .. (صورة ثنين مقززين ومعطين العالم أشكل)؟!

رجعنا للفندق في الليل وظهورنا منقطعه من كثر المشي والتمشي .. يوم تونا متواسين على السرير نبي نرقد يوم ولع نور في سقف الغرفة ثم سمعنا صوت انفجار (تسنّه واحد طايح من السطح على تانكي ماء فاضي!) << أشوى اني منيب مراسل للعربية .. تسان الحين مطرود !

يوم طلينا مع دريشة الغرفة ونشوف في السماء دخان ونسمع صوت طيارة حربية ماسكتن الكتف الأيسر من السماء وتمشي طبلونها وتكبّس بالنور ؟! << لا تشرهون هذي ثقافة بزران الدائري!

وننحاش مع الدرج ونحول تحت يوم لقينا كل سكان الفندق في اللوبي (اللي عليه هدوم واللي عليه صروال وفنيله علاقي وطالعن شعر كتوفه تسنّه لطخة ثيّل تحت بزبوز برادة ... واللي تهيبل ومسويه نفسها مرتاعه وطالعتن بالروب بدون ملابس داخليه وكل شوي تهج وتصك في ذا الروب تسنّها تهف على المكينة عشان تبرد والا عشان تستعرض يعني ترى عندي روب ) << تسنّي خااابر .. الحين ابو محمد بيجي يركض وفي يده خبزه يحسب الروب حق الفطور .. ترى الروب لباس مهوب اكل يا بعد قلبي وهـ بس يا نظووول !

برايفت * زرار كوت : بنغط في ذا الروب .. بخبزتنا .. ان بغى روب اكل .. او روب هدوم ( صورة زرار وهو مرتاع ويقول : وجع وش جاب البنز فيذا ؟ )

في ذا اللحظة درينا إن إسرائيل دابجتن بيروت وان المطار معاد هوب لنا .. وان رحلتنا راحت ملح !

التفت على رفيقي ابي اطمنه .. وقلت له ترى مهيب ذي اول مره تنكّد علينا اسرائيل في لبنان .. قبل كم سنه ضربت مكاين الكهرب وروعتنا وانحشنا ثم تحسفنا .. ذا المره منحاب منحاشين الين نشوف اليهود يصورون مع لاعبين منتخبنا في السلودير ؟! <<<< هذا ان لقوا ياسر .. والله ياهو سريع ذا الآدمي .. شوف عيني وهو يركض منحاش .. انه أسرع من الددسن 82 ..!

قال رفيقي : ايه هين نقعد .. ياروح ما بعدك روح .. أنا أصلن اتصلت على أهلي ووصيتهم يبنون لي مسجد في اليمن .. ويحطون برادّة مسجد سبيل باسمي في ديوان الخدمة المدنية عشان أكسب أجر ذا الضعوف اللي يتبطحون بملفاتهم في ذا القوايل .. ؟! وانت وخشتك تقول نقعد ؟؟!!

الحقيقة انا يوم شفت خويي يوصي دخلني الماء وبغيت اسوي سواته واوصي أهلي يشترون بطاقات سواء ويوزعونها على بنات الرياض كود الله يفك بنت غافلة قاعدن يحفر لها ذيب ببطاقة ؟! ( صورة ذيب عليه جلد خروف ويقول مباااااع .. مبااااااااع .. ترى منيب أعرف اقول عواااااا )!!

يوم ركد الرمي .. قالو لنا حقين الفندق ارقو لغرفكم والصباح رباح .. رقينا وتعوذنا من بليس .. ورقدنا وعيوننا تلاقط نبي النوم .. والنوم ما يبينا ؟!

( صورة واحد يعد خرفان تطامر من فوق راسه يبي النوم وكل ما بغى يغمض طاح عليه دمنه )!!

يوم طلعت الشمس .. ونلقط جوازاتنا ونروح للسفارة ( جعل من حطها في الجنه ووالديه ) <<< بغيت ابتسي يوم شفت علم السعوديه ؟!

يوم دخلنا في حوش السفارة ونلقى العالم حقين السلودير كلهم في ذا الحوش ؟! حتى بنت راعي أطول عماره في الرياض كانت فيذاك ؟! << يقال لك الحين ما احد عارفها يا الفضيحه ..! ( معليش ريم ترى كل قصدي يوم اجيب طاريتس عشان اتميلح عند ابوتس كودي احصل منه لو محصول مكينة الكاشير في هايبر بنده ليلة الخميس )

تكلمنا مع موظف في السفارة .. وقبل لا نكمل سالفتنا .. قال انتم معكم عائلة ؟؟

قلنا لا والله عزابيه .. عسى مهيب السفارة للعوائل فقط (واحد متأثر بنظام الرياض والمنتزهات)؟!

قال الموظف : لا بالله السفارة لكل مواطن .. بس تسانكم عزابيه فترانا محتاجين فزعتكم .. اذا ما عليكم كلافه يا ليت لو تجمعون الجوازات من العوائل وتسجلونها .. وترى الدعوى سهله والأوضاع ما بعد وصلت مرحلة الخطر.. ولا انتم في حاجة للفركه بدري ؟! << تبون الجد .. يوم قال الفركه .. حسيت انه من الديره واستحيت ؟! وقلت والله لو يستلموني اهلي تقطيع ثلاجة منيب طالع من بيروت الين تطلع أخر عائلة سعوديه ؟!(صورة مواطن سعودي نشمي معدنه أصيل ولا عنده في أحد)؟!

يوم التفت على رفيقي ولاه مثلي .. فاتن ومتحمس .. ونقوم نجمع جوازات ذا الناس ونسجلها .. ونعطي كل عائلة رقم الباص وموعد الحضور وقص البوردنيق ؟! << منحاب أردى من موظفين الخطوط السعوديه .. عندنا بوردينق ووزن عفش .. وتوزيع مقاعد شي على النافذه وشي على الممر .. ومقعد معاوني للسواق ؟!


وخذنا يومين على ذا الشغل .. نداوم دوااااااااام في ذا السفاره ..( منحاشين من الدوام وابتلشنا بداوم ) ؟! << بس الشهادة لله .. موظفين السفارة بيّضو الوجه مع الناس ومعنا .. ييزي انهم غدونا معهم مفاطيح ! (صورة واحد معه عود أسنان ويقول يازين ذا الدوام اللي كله فزعه وتميلح عند عوائل ما يزعلون وحريمهم فاتشه وتقرب منها تسنّك تبي تسمع صوتها زين وانت قاعد تروح عطرها وانت راعي الفضل والمنّه .. ومع كل ذا تحصل وجبة غداء مفطح )؟!


يوم جاء ثالث يوم .. يوم تسّن الدعوى صارت جد .. والدبج وصل فندقنا وقالو لنا حقين السفارة جيبو شناطكم وامرحو عندنا ترى الدعوى مهيب ضرب مكينة كهرب ؟!

يوم رحنا نجيب شناطنا من الفندق ولا الفندق مافيه احد .. والغرف بيبانها مهجّجه ولافيها من يقول ربي الله ؟!
ونلقط شناطنا ونجمرك ثلاجات ذا الغرف اللي حولنا وناخذ من ذا القويريرات اللي تسنّها (تولة دهن عود) << سبحان الله ينجرح أحد والا شي .. يصير معنا مطهر (صورة وجه برئ)!!

دخلنا السفارة .. وقلنا : يالربع دام الدعوى مهيب ضرب مكينة كهرب .. والعالم فركوا .. نبي اهلنا الله لا يهينكم .. قالو ابشرو والله .. انتم ما قصرتو معنا وفزعتو .. وانحن بنفزع معكم وبنركبكم على أقرب باص الصباح ؟!


ونرقد في قبو السفارة .. يالله لك الحمد أمن وأمان تحت راية التوحيد لا اله الا الله محمد رسول الله (صورة مواطن طفران سامعن إن الديوان الملكي عنده يوزر في الاقلاع وان فيه شرهات توصل عن طريق الخاص )؟!

يوم أصبحنا ونفطر مع موظفين السفارة ونشرف على توزيع العوائل على الباصات .. ثم نطمر في ظهر هاك الباص اللي تسنّه طيارة جمبو ؟! يوم ركبنا في الباص ولاه كله عوائل وبنات تسنّهن ذر .. من كثرهن ؟!
وينطلق الباص للحدود .. في تمام الساعة التاسعه صباحاً ..!



(( الفصل الرابع والأخير ))


انطلق الباص وكان السواق سوري بطران .. و على قولة أهل سوريا ( ابضااي )! ومعه ولده الصغير معاوني .. و أنا ورفيقي قدام جنب السواق نشرف على الرحلة .. والناس من كثر ما تشوفنا متحمسين يحسبونا من موظفين السفارة ..(بعضهم شايفنا في السفارة نجمع الجوازات ونسجل وضامن أننا موظفين سفارة .. وبعضهم يدربي راسه ما يدري هي مسنّده والا محدّره)؟!<< للعلم ترى معنى مسندّه يعني وحده ورى ظهرها مسنده .. ومحدرّه يعني وحده ما ورى ظهرها شي ( صورة البنز وهو رايح يجيب العقال عشان يجلدني )!


قال السواق ترانا بنروح مع طريق بعيد(وين اذنك يا حبشي) عشان اليهود ضربو الخط اللي يروح لسوريا .. وشكلنا بنبطي .. لكن تطمنوا الباص جديد والسواق راعي ديره ويبخص الطريق ؟!

والله ونتله مع ذا الخط .. يوم أقبلنا على جمارك لبنان ولا فيه زحمه تروّع ( البااصات متقااضبه والعالم اللي تمشي على رجيلنها أكثر من اللي في السيارات .. اللي شايل شنطته على راسه .. واللي شايل فراش .. واللي شايل كيرم ) <<من حق تسان راعي ذا الكيرم مهوب شاربن له جركل عصير عنب محمض وماسكتن معه يطبب الخمسين ؟!

قلنا لأخوينا في الباص .. هاتو جوازاتكم بننقز على رجلينا نختمها فيما ياصل الباص .. عشان ما يضيع وقتنا .. والله ونجمع الجوازات ونركض بين السيارات يوم وصلنا للجمارك ولا العالم ملاقط وهواش وصجه ولجه .. ونستعين بالله ونخوض ام المعارك وناخذ كم كرت ونبعد شوي ونقعد نعبئ المعلومات .. يوم ظلو علينا الحريم يحسبونا موظفين << شكل وجيهنا تساعد اننا نصير حمير مكده .. ؟!


قلنا لهم انحن تبع باص واحد ماعلينا منكم ؟! اذا تبون كروت خذو كروت امّا اذا تبون نكتب معلومات فمعصيين .. (صورة واحد يقول ذا الحريم يزعجون الدولة بالتعليم والدراسه واذا جاء وقت الجد .. ولاهن كمخ ما يعرفن لو يكتبن اساميهن ) << عسى ما يقرن حريم باصنا سوالفي ثم يزعلن علي ويقولون ذا البثر قاعد يزربنا ويتمنّن علينا في الانترنت ؟!


خلصنا جوازتنا .. وعودنا للباص .. وفي الطريق شرينا كرتون ماء وبساكيت وكاكو (خابرين ذا الحريم ضروس والطريق طويل) يوم وصلنا ونبدأ نوزع الماء والكاكاو على ربعنا في الباص .. ثم نوزع الجوازات وننادي كلن باسمه .. يوم التفت علي خوي وقال : زرار لا تقول اسم العائلة .. عن الاحراج ؟!

قلت : ياشينك وانت مسوي زحمه .. الحين بالله عليك ذا وقت تميلح عشان تقول اسم عائلة وما اسم عائلة (صورة واحد يقول الأمر أكبر من ذلك) عسى الله بس يوصلنا بالسلامة ؟! ترى ذا الحريم الحين في ذمتنا .. واسمهن اخواتنا وامهاتنا دامنا في ديره مهيب ديرتنا .. واذا وصلنا بالسلامة ذيك الحزه تعال انشدني عن العوائل وذا الخرابيط

والله ونمشي .. الين وصلنا حدود سوريا .. وننشب ونتأخر خمس ساعات في الحدود عشان معنا عائلة عندهم شغاله !! << ذا الشغالات ما منهن الا المصايب .. الله يجبر مصاب أسرة التركي اللي راح مستقبله بسبب شغاّله ؟!

ونتصل على الرياض .. والرياض تعمّد السفارة في سوريا .. ويجينا مندوب السفارة تسنّه ابو الحروف ( أسرع من الشدّه واطول من المّده واحدّ من السين )؟!

قال : وش تبون بس ؟
قلنا نبي ذا السوااريه يفكونا باصنا ونمشي ؟!
وياخذ المندوب جوازتنا ويدخل عليهم ويحوسهم شوي ثم يطلع والجوازات مختمه (وهــ بس من حكومتنا الرشيده) << ما حديتوني على الحلف ان واحد معه جواز أوربي يوم شاف مندوب سفارتنا وفزعته لنا .. انه طلب مني ومن مندوب السفارة صورة خاصه عشان يسدح موضوع في النت يبربس فيه حكومته ويمدح حكومتنا ! ( وين يوزر الديوان يا جماعه يشوف ذا المدح )

يوم دخلنا حدود سوريا .. يوم ركدت أمورنا وارتحنا من القلق النفسي .. وبدينا نهوجس في الاكل والراحه .. وناقف في ذيك المحطة ( اللي تسنّها محطة حفر العتش من كبرها .. فيها مطعم وبقالة ودورات مياة )..!


ونخلي ذا الحريم يتوضن ويغسلّن ذا المصافط والصدوع اللي خاست من كثر القعاد على في الباص .. ونصلي ثم نطلب عشاء .. ( السوريين ما عاد يقبلون ليرة لبنانية .. وبعض العوائل ما كان معهم الا ليره ؟ .. وانا مخباتي مليانه دولارات ما أمداني أصرفها من يوم وصلت وانا مدوام في السفارة .. وقمت أعطي الناس من ذا الدولارات عشان يدبرون أنفسهم .. وهم يأخذون عادي ولا عندهم في ) !!

ثم انطلقنا حوالي الساعة حدعش في الليل لدمشق ( قعدنا 16 ساعه من بيروت لدمشق ) ؟!
يوم ركد ممشى الباص .. وكلّن غمّض يبي يرقد شوي .. وافتح جوالي اتعبث فيه ؟!

يوم شغلت البلوتوث والقى اسم (لحظات إعجاب في باص) قلت بس هذا انا .. بس من هي ذا اللي اعجبت بي انا وخشتي ؟!

قمت وراسلتها وكان اسمي (تعبك راحه) ؟! << ابو طبيع ما يخلي طبعه .. نروووووووح ثم نعوّد على الغزل ؟!

أول مره في حياتي أحس إني أتكلم مع نفسي بإحساس صادق .. كنت أراسلها وأنا ما في خاطري إلا قولة الحمد لله على السلامة .. وان قلوبنا على بعض وان الأمن والأمان في ديرتنا نعمة محسودين عليها ؟! ( صوت موسيقى هاديه ومنظر بخشة في وسطها نخله ) << مخرج تلفزيون يصور اغنية سلامة العبدالله الله يرحمه ..!

كانت تراسلني وكلها إعجاب بحرصنا على بعض .. وشعور الأسرة الوحده ومشاعر الغربه والخوف اللي تقرّب البعيد وتكسّر الحواجز بين الناس وتخليهم إخوان وأخوات تجمعهم مشاعر ساميه حتى في اسمائهم في البلوتوث ؟؟!!

.. يوم وصلنا دمشق .. وينزل خويي للمطار ومعه من كل عائلة مندوب .. عشان كلن يحجز على أقرب رحلة .. وانا اقعد مع سواق الباص مع الحريم .. والعفش .. لا ينحاش ذا السوري بقشنا ثم نشغل السفارة بمشكلة جديدة ؟!

وقفت في الباص وتكلمت والقيت كلمة عصماء لو سمعها الحجاج شرط ان ينطلني انا وهي في الماصله ؟!
ومع هذا تفاعلو معها العوائل .. وعبرو عن مشاعرهم .. وكان من اطرف من قالو يوم سألتهم : عسى ما تعبتو في ذا الباص ؟!

قالو : هذي أجمل رحلة باص .. رحنا فيها ( شكلهم عيال نعمه ولا قد راحو في باص لمكه والا تسان ما قالو تسذا ) !!


ثم قامو يشكرون الحكومة ويشكروني ويقولون تكفى وصل شكرنا للملك عبدالله قلت ان شاء الله يبلغ ... بس ورى ما تشكرونه انتم ؟ << حسيت انهم سودانيين يبون كلش اسويه لهم ؟!

قالو : هماك تشتغل في السفارة .. ؟!
قلت أي سفارة واللي يرحم والديكم انا مثلي مثلكم .. منحاش من جحيم الحرب وخربانه إجازتي .. وشكل البنز ناظلني على ذا السفرة ؟!

يوم قامو يضحكون ويتعذرون ... قالو والله انا كل ذا الوقت نحسبك موظف سفارة .. ونمعط من دراهمك على انها حق من حقوقنا .. قلت يعني افهم من كلامكم انكم تبون رقم حسابي عشان ترجعون دراهمي (صورة واحد يقول خلاص وصلنا وهم بخير .. وانا منيب فاضي أكد على عميان)!

قالو أي والله هات رقم حسابك .. ورقم تلفونك .. وان تسان اهلك ما بعد زوجوك .. ترانا بنزوجك ؟! << هذي من عندي عشان اقهر البنز !

ومنيب معلمكم وش صار في لحظات الوداع في مطار دمشق .. لأني منيب احب الوداع وطاريه .. خاصة انها كانت (لحظات إعجاب ثانيه في مطار)؟@!


ما يستفاد من الموضوع :


عسى الله يحفظ لنا ذا البلد .. وأهله .. ويرفع عن لبنان وأهله الحرب ويجعلنا دايم محل إعجاب في حلّنا وترحالنا ؟!
وهذا الموضوع اهداء بمناسبة قمة الرياض قمة السلام قمة الروقان لأهل الرياض اللي ربحوا إجازة يومين ما حسبوا لها حساب ..!

تسلم اخوي على القصه

الله يعطيك العافيه على المرور عبادي

الله يعطيك العافيه على المرور *دمعتي فرحتي*

هههههههههههههههههههههاي
قصه ولا ارووع
مشكوور خيوو
احلى قصه قريتها ههههههههههههههاي
ثانكيو خيووو الانيق

اقول نسمة حب شكلك تأثرتي بالقصه قلبتي لبنانيه

يسلموووووووووووووو على القصه اخوووووووووووي

العفو

امين ربي يحفظ بلدنا وبلاد المسلمين


بس القصه تحفة التحف <<< ميته ضحك


انا بدري من اللي معلمه اللغه العربيه ياهو قالب سمجته هع هع هع هع


تشكرات كبيرات خيو ع القصه [/img]

شكرا لك نورتينا